នៅថ្ងៃទី១៤ ខែធ្នូ ឆ្នាំ២០២០ ព្រះព្រហ្មកេស ហេង ប៊ុនសាម ព្រះសមុហ៍ធរអនុគណស្រុកស្រែអំបិល និងជាព្រះចៅអធិការវត្តអង្គរភ្នំខ្លុង លោក ម៉ាស់ សុជា សមាជិកក្រុមប្រឹក្សាស្រុក និងលោក ជា ច័ន្ទកញ្ញា អភិបាល នៃគណៈអភិបាលស្រុក និងជាប្រធានអនុសាខាកាកបាទក្រហមកម្ពុជាស្រុកស្រែអំបិល បានដឹកនាំក្រុមការងារ និងមានការចូលរួមពីអាជ្ញាធរឃុំ ភូមិ និងអង្គការម្លប់ព្រហ្មវិហារធម៌ស្រុកស្រែអំបិល ចុះសួរសុកទុក្ខ និងនាំយកគ្រឿងឧបភោគបរិភោគឧបត្ថម្ភជូនបងប្អូនប្រជាពលរដ្ឋ ចំនួន ០៨គ្រួសារ ដែលរងគ្រោះដោយខ្យល់កន្ត្រាក់ បណ្ដាលឲ្យផ្ទះចំនួន ៨ខ្នង របេីកស័ង្កសី ៥៩សន្លឹក និងទ្រេតសសរផ្ទះ ១ខ្នង ស្ថិតនៅភូមិព្រាំង ឃុំដងពែង ស្រុកស្រែអំបិល ខេត្តកោះកុង។ គ្រឿងឧបភោគបរិភោគទាំងនោះ រួមមាន អង្ករ ២០គ.ក្រ មី០១កេស ទឹកត្រី០៣ដប ប្រេងឆា ០៣ដប ទឹកស៊ីអ៊ីវ ០៣ដប ភួយ០១ ឆ្នាំង០១ កន្ទេល០១ ធុងចម្រោះទឹក០១ តង់០១ វែកបាយ កាទឹក និងទទួលបានស័ង្កសីទៅតាមស្ថានភាពខូចខាតជាក់ស្ដែង។ ក្នុងនោះដែរ ព្រះសមុហ៍ធរអនុគណស្រុកស្រែអំបិល បានឧត្ថម្ភបច្ច័យក្នុងមួយគ្រួសារចំនួន ៥០,០០០រៀល និងក្រុមការងារសាខាកាកបាទក្រហមឃុំដងពែងឧត្ថម្ភថវិកាក្នុងមួយគ្រួសារចំនួន ៤០,០០០រៀល។